Vieiros

Aínda que recoñeceu que "a fusión de municipios é na actualidade unha proposta utópica", o alcalde de Lalín e presidente da Fegamp, Xosé Crespo, apostou por esta solución "como o recurso de futuro máis axeitado para atallar os males endémicos que ameazan a administración local en Galiza. Crespo considera que a fusión dos concellos é "enormemente vantaxosa" tanto desde unha perspectiva funcional, posto que lle permite aos concellos máis pequenos acadar un tamaño óptimo para exercer as súas funcións con garantías, como desde a perspectiva do financiamento externo, xa que se incrementan notabelmente os recursos e diminúe a dependencia doutras administracións.

Crespo fixo estas declaracións durante o acto no que se presentou no Pazo de Fonseca de Santiago o estudo sobre "Os concellos galegos no século XXI" encargado ao IDEGA polo concello de Lalín e financiado por Caixa Galicia.

O estudo fai unha referencia concreta á nova situación que se xeraría se os seis concellos da comarca do Deza (Lalín, Silleda, Rodeiro, Vila de Cruces, Agolada e Dozón) decidisen fusionarse.

Entre as conclusións xerais do estudo, destácase a necesidade de recoñecer nunha próxima reforma da Constitución a "autonomía local" como un dereito fundamental.

Tamén se recomenda a "reconsideración da Provincia como entidade territorial local nas Comunidades Autónomas pluriprovinciais", aínda que poden permanecer como "división territorial para o cumprimento das actividades do Estado", por exemplo, como circunscripción electoral para as eleccións xerais.

Outro dos aspectos que compriría revisar, segundo o estaudo, é o da eleccións dos alcaldes. O informe lembra que a Constitución do 78 permite elixilos "polos concelleiros ou polos veciños". O estudo indica que os concellos deben ter a atribución para elixir a opción que consideren máis axeitada.

O informe avoga ademais polo recoñecemento das parroquias. "O municipio como Entidade territorial local de estatuto constitucional exerce a súa competencia nun termo municipal (de xeometría variábel) que corresponde ás Parroquias (xeometría estábel). A parroquia, como entidade local propia de Galiza insírese na organización municipal baixo a denominación de Distrito Parroquial".