Vieiros

Nunha intervención parlamentaria a petición propia para explicar os contidos do Plan de Promoción Turística, Pérez Varela anunciou que a Xunta cederá o protagonismo dado ao Xacobeo a dúas cuestións: o fomento da cultura da auga como efecto saudábel (tanto do mar, os ríos, "as glamurosas rías" e instalacións termais) e ao foro internacional "Galiza: camiños da concordia. Solidariedade e Paz".

"Será o gran paraugas da promoción da oferta da cultura galega en 2005", afirmou o conselleiro en referencia ao foro. Nel participarán "o mellor do mellor": unha concorrida nómina "de Premios Nobel e Premios Príncipe de Asturias" como Kofi Annan, Mijail Gorvachov, Jimmy Carter, Rigoberta Menchú ou J.R. Rowling, a autora de Harry Potter.

O outro eixo da promoción turística será a "cultura da auga", centrándose nos seus "efectos saudábeis" e no seu potencial de atracción de visitantes a través de competicións de vela, entre as que o conselleiro destacou a celebración da Volvo Ocean Race.

A oposición criticou o Plan presentado por Pérez Varela. Considerou a intervención do conselleiro unha "mera rolda de prensa" sen contido. O deputado nacionalista, Domingos Merino, cualificou as propostas de Pérez Varela de "resesas" e "chapuzas". Para os socialistas, o inestimento neste plan de promoción turística é un "despilfarro".