Vieiros

O ILGA, a asociación internacional de gais e lesbianas, está a promover a creación do Día Mundial de Loita contra a Homofobia. Nesta altura son máis de 70 os estados que condenan a homosexualidade, moitos deles con penas de prisión de máis de dez anos e en 5 con pena de morte (Afganistán, Irán, Iemen, Sudán e Arabia Saudí). Pero hai máis homofobia cá legal: en Brasil, por exemplo, 1960 persoas morreron en crimes homofóbicos nos últimos vintecinco anos. Para os promotores, o recoñecemento oficial deste Día representaría un claro empeño da comunidade internacional na loita contra a homofobia. Con todo, aínda recentemente foi rexeitada a proposta brasileira de integrar a homosexualidade dentro da Carta dos Dereitos Humanos. A campaña para conseguir un Día Mundial de Loita contra a Homofobia pódese asinar en liña.