Vieiros

A Coalición pola Conservación dos Fondos Mariños está formada por 30 organizacións, entre as que figuran as organizacións ecoloxistas internacionais Greenpeace, WWF (WWF/Adena en España), Oceana ou Birdlife (SEO/Birdlife en España). Máis de 1.000 científicos e expertos mariños de todo o mundo, tamén do Estado Español, respaldan a campaña desta coalición que pretende evitar unha actividade que equivale a arrasar un bosque tropical para apañar algúns froitos.

A pesar de que non se estableceu polo de agora unha moratoria, a propia ONU vén de recoñecer que a pesca de arrastre en profundidade ten un impacto negativo sobre os fondos mariños. A pesca de arrastre en xeral ten sido cuestionada desde o século XVIII polos seus efectos negativos sobre a pesca e o medio mariño, tamén por persoalidades galegas como Martin Sarmiento ou José Cornide.

Apoio a Greenpeace

En relación cos feitos acontecidos onte no barco "MV Esperanza" de Greenpeace no porto de Vigo, e coas declaracións dalgunhas organizacións, as principais organizacións ecoloxistas galegas consideran absolutamente inxustas as acusacións de "mercenarios" en contra dos intereses galegos dirixidas aos compañeiros e compañeiras de Greenpeace. A campaña de Greenpeace e da Coalición pola Conservación dos Fondos Mariños é de ámbito internacional, está fundamentada en argumentos sólidos e non vai dirixida especificamente contra os 40 barcos da frota galega que practican este tipo de pesca.

As organizacións ecoloxistas defenden o mar e a explotación sustentábel dos seus recursos, a única viábel e socialmente beneficiosa a longo prazo, por riba de intereses nacionais de ámbito sectorial e de curto prazo. A defensa do emprego, do benestar social e do desenvolvemento non pode conlevar nunca a defensa de actividades ambientalmente irresponsábeis.