Vieiros

"A administración galega funciona a todo gas", sentenciou este xoves logo do consello de Xunta, insistindo en negar que a crise do partido vaia afectarlle ao seu goberno ou estea paralizando a actividade da Xunta. Na mesma semana en que admitiu que podería haber novos cambios no goberno galego e en que o vicepresidente presuntamente mellor colocado para a sucesión, Alberto Núñez Feijoo, ameazou con presentar a demisión, Manuel Fraga insiste: "Xa lle gustaría á oposición ter un partido tan sólido coma o noso".

"Seguirei se deus quere e vostedes non me acaban coa paciencia", declaraba Manuel Fraga hai uns días fronte aos xornalistas. E a paciencia non caracterizou precisamente as súas últimas intervencións fronte aos medios, onde reiterando a negativa ás preguntas sobre os últimos acontecementos no seu partido, afirmou que "perden o tempo" e "todo o que hai que dicir está dito".

Ás voces da preocupación por unha crise interna que vén lastrando a actividade do goberno galego as últimas semanas, uníase a Confederación de Empresarios Galegos, que por boca do seu presidente, Antonio Fontenla, amosaba o disgusto do sector empresarial pola inestabilidade existente e dicía agardar que todo se tivese solucionado "definitivamente".