Vieiros

Os traballos de elaboración da candidatura están a punto para ser presentados antes do 15 de outubro en París, data límite para a presentación das candidaturas que optará á 3ª proclamación das Obras Mestras do Patrimonio Inmaterial. No proceso de creación participaron institucións culturais, antropólogos, centros universitarios, asociacións etnográficas e culturais de Galicia e do Norte de Portugal.

O dosier elaborado baixo o título " A TRADICIÓN ORAL GALEGO-PORTUGUESA. SIMBOLOXÍA E APROPIACIÓN DO MEDIO NATURAL ", contou co asesoramento do Centro de Antropoloxía Aplicada da Universidade Fernando Pessoa do Porto e o Consello da Cultura Galega. No traballo faise unha detallada e fundamentada argumentación da orixe común deste patrimonio e das manifestación de excelencia que a Unesco deberá examinar. Entre outras manifestacións, destácase a regueifa ou os cantos ao desafío, os cantares e lendas e as expresións vinculadas ao ciclo agro-marítimo, os oficios, as formas simbólicas, ornamentais e musicais e os ámbitos festivos.

Unha rede de centros educativos xa se constituíron formalmente como ESCOLAS PROMOTORAS da Candidatura, mediante acordos unánimes das comunidades educativas. Concellos e outros organismos expresaron e enviaron documentos de apoio á candidatura, como os de Vigo, Pontevedra ou a Real Academia Galega.