Vieiros

Todas as posibilidades continúan abertas no día que remata o prazo que Fraga e Baltar estableceron para facer pública unha decisión sobre o futuro do Partido Popular en Ourense. Nin sequera se sabe con certeza se a xuntanza terá lugar, no caso de que a escisión se confirme durante a xornada. Mentres a dirección do PP en Madrid cala e entrega toda a responsabilidade da solución da crise á capacidade de negociación de Fraga, a dirección galega emite unha mensaxe case unánime: "o acordo aínda é posíbel". Desde Ourense, chegaron ventos de distensión na fin de semana, pero sen soltar as mans da corda da tirapuxa. Un repaso á prensa de hoxe ofrece versións diversas, segundo lles vaia na feira: desde os que dan por feito o acordo ata os que aseguran que a escisión é xa unha realidade.