Vieiros

Fraga adiou anunciar a súa decisión de adiantar as eleccións previstas para outubro de 2005, pero asegurou que o faría "segundo a evolución" da crise do PP provocada pola rebelión ourensá dos partidarios de Baltar. Preguntado sobre a posibilidade do adianto electoral, Fraga utilizou o mesmo esquema retórico que emprega en tantas ocasións: negar por diante a premisa maior e acto seguido deixar a porta aberta ao seu cumprimento. Despois de dicir que "non entra nos meus cálculos, non o fixen nunca e non o creo necesario", o presidente da Xunta recoñeceu que "podería cambiar de opinión segundo a evolución" dos acontecementos. Para Fraga, as declaracións de Baltar de que respectaría a "lealdade institucional" aínda en caso de escisión é garantía de abondo para acabar a lexislatura.