Que acontece en Vigo entre o 22 e o 23 de maio? En que actividades podemos participar? Que temas tratan no Foro? Que é e onde se localiza a Feira Feminista? Haberá sitio para aparcar o coche? A estas e a outras cuestións prácticas tentamos dar resposta nesta guía, para que a ninguén se lle complique a participación na Marcha Mundial das Mulleres por falta de información. Imprime este documento se non queres perderte!
FEIRA FEMINISTA
Que é: exposicións fotográficas, obradoiros, proxeccións, debates e representacións teatrais, entre outras actividades, de asistencia libre e gratuíta.
Cando: sábado 22 de maio, de 10 da mañá a 8 da tarde.
Onde: Zona de beiramar. Diferentes espazos, segundo temática.
-Praza da Estrela: Muller e medio ambiente. Muller e antimilitarismo.
-Praza do Náutico: Educación para a igualdade. Saúde, dereitos reprodutivos e aborto.
-Estación Marítima: Mocidade. Mulleres inmigrantes.
-Mirador da Praza da Pedra: Violencia de xénero.
-Praza do Berbés: Feminización da pobreza, dereitos laborais e sociais. Liberdades sexuais.
-As Avenidas: casetas de organizacións feministas e postos de artesanía.
Máis información
FORO DE DEBATE E REFLEXIÓN
Que é: mesas de debate, a cargo de recoñecidas expertas. Asistencia previa inscrición (o prazo rematou).
Cando: o 22 de maio, durante todo o día.
Onde: no Centro Cultural Caixa Nova (Rúa Policarpo Sanz).
Abórdanse os seguintes temas:
-A sustentabilidade ecolóxica, alternativas feministas
-Mulleres e espiritualidade, corporidade e resistencia
-Contribucións feministas na orixe e desenvolvemento dunha Constitución Europea.
Haberá tradución simultánea em francés, inglés, español e galego-portugués.
Máis información
CONCERTO
Que é: concerto de Uxía, Amparanoia, Mercedes Peón, Souad Massi e Tucanas. A entrada custa 6 euros.
Cando: 22 de maio, a partir das 20.30 horas.
Onde: no Parque de Castrelos.
MANIFESTACIÓN
Que é: acto reivindicativo convocado pola Marcha Mundial das Mulleres, baixo o lema "Diferentes si, desiguais non'. A organización agarda a asistencia de 30.000 mulleres, procedentes na súa maioría de Galiza e do Estado español, ademais de representantes de colectivos feministas de Francia, Portugal e doutros países europeos.
Cando: o 23 de maio, con saída ás 12 da mañá.
Onde: a manifestación parte da Praza dos Cabalos e continúa por Gran Vía, Rúa Venezuela, Camelias e chega ao punto final nas Travesas. Alí celebrarase un acto presentado por Ana Romaní, e no que intervirán as galegas Victoria Iglesias e Lupe Ces; e a holandesa Charlot Pierik e a belga afincada no Quebec, Brigitte Verdiére, ambas as dúas integrantes veteranas da Coordinadora da Marcha Mundial das Mulleres.
ONDE APARCAR
Autobuses: deben aparcar na estación de Autobuses de Vigo, na Avenida de Madrid, a 5 minutos da Praza dos Cabalos, punto de partida da manifestación.
Coches: a organización recomenda estacionar os coches particulares en Navia. Hai que coller a circunvalación que está fronte á estación de autobuses de Vigo e ir en dirección á Avenida de Castelao (no barrio de Coia) e na rotonda antes de empezar a Avenida de Europa, coller dirección Navia.
ONDE COMER
Na Praza da Estrela, na zona de beiramar, haberá un posto de comida pero a organización recoméndalles aos visitantes que fagan uso dos establecementos de hostalería do casco vello vigués, preparados para a ocasión.
PUNTOS DE INFORMACIÓN
-Na Lonxa do Concello, na Praza do Rei.
-Rúa Teófilo Llorente, na zona de Beiramar, ao lado da Pedra.
-Rúa Cánovas del Castillo, na zona de beiramar.
-Porta do Sol, ao lado do Sireno.