Vieiros

A candidatura galego-portuguesa, que será presentada o 23 de abril no Verbum de Vigo ao mediodía, está promovida polas escolas galegas e portuguesas que participaron na experiencia de radio interescolar Ponte...nas Ondas e tamén por escolas asociadas á rede da Unesco. Ponte...nas Ondas! leva dous anos traballando na redacción e nos contactos entre as institucións para a presentación da candidatura ás proclamacións do 2005-

Segundo 'Ponte...nas Ondas', a cultura galego-portuguesa está baseada na sociedade tradicional agrícola-mariñeira e abarca manifestacións mitolóxicas, festivas, artesanais, orais e musicais asociadas aos ciclos naturais. A oralidade (regueifas, cantarse de desafío), a música (cancioneiros medievais, o Pórtico da Gloria...), a cultura mariñeira (piscatorias) e as formas de solidariedade colectiva (monte comunal) son algúns dos elementos comúns.

A Unesco contempla, ademais de que cada estado presente cada dous anos unha candidatura propia, a posibilidade de presentar candidaturas multinacionais naqueles casos en que exista un patrimonio vivo e diverso que se extenda por riba das fronteiras. Nestes casos a iniciativa debe partir da base social e procurar espertar a sensibilidade das institucións e gobernos.

En canto aos criterios de selección a Unesco establece que deberá ser un patrimonio enraizado nunha tradición, en perigo de desaparición, excelente e cunha unidade cultural espallada polos diferentes estados.