Vieiros

O escritor Xurxo Borrazás protagoniza a capa do cuarto número de ProTexta, (.pdf / 5,3 Mb) o suplemento de libros da revista TEMPOS Novos. Coincidindo coa publicación do seu polémico ensaio Arte e parte (Galaxia) e coa saída da versión castelá de Ser ou non, publicada por Caballo de Troya co título La aldea muerta , o de Carballo debulla a súa visión crítica da cultura galega e traza as estremas da súa propia posición no sistema.

Ademais desta entrevista co autor de Cabeza de chorlito, a revista que coordina Iago Martínez inclúe unha conversa entre os historiadores Justo Beramendi e Ramón Villares. O diálogo aproveita a publicación de De provincia a nación. Historia do galeguismo político (Xerais), “a obra magna de Beramendi” ao ver de Manuel M. Barreiro, para revisar a deriva do nacionalismo galego contemporáneo.

Entanto Daniel Salgado e Francisco Sampedro radiografían a deriva ideolóxica dos pensadores da esquerda francesa e Miguel Vila dá conta do último de Xavier Castro, Historia e vida cotiá en Galicia (Nigratrea), na banda da narrativa son Martin Pawley e Delfín Caseiro os que se ocupan das últimas novidades editoriais de Teresa Moure e Alfredo Conde respectivamente. Blogs, literatura na rede, un paseo con Robert Walser da man de Lupe Gómez, unha entrevista ás Garotas e un cumprido mangado de críticas, dende a poesía e a literatura infantoxuvenil ao teatro e á banda deseñada, de aquí e de fóra, completan o repertorio de ProTexta, que neste número dedica tamén dúas páxinas aos libros que están para vir neste último treito do ano.