Vieiros

Vieiros de meu Perfil


Canal Verde

Xestionado pola Federación Ecoloxista Galega e Vieiros
RSS de Canal Verde
Plan acuícola

Tirapuxa entre Ministerio e Feijoo, con Touriñán na picota

Medio Ambiente, Rural e Mariño afirma que só se autorizou a afección por Costas; o presidente da Xunta alega que debería indemnizar a Pescanova con 30 millóns.

Redacción - 17:45 15/09/2009

O Ministerio de Medio Ambiente e Medio Rural e Mariño rexeitou os "intentos de confusión informativa" da Xunta ao subliñar que en xullo de 2005 advertiu o Goberno de Manuel Fraga de que non emitiría un informe sobre o Plan Acuícola até que o Executivo non realizase a súa avaliación ambiental, que apunta que "nunca" chegou a efectuarse.

Tamén aclarou que o proxecto de piscifactoría presentado por Pescanova para o cabo Touriñán non dispón de informe medioambiental favorábel, senón só unha concesión en dominio público.

O ministerio chamou a atención sobre "a diferenza dun procedemento de avaliación ambiental dunha petición concreta de ocupación de dominio público para a captación de auga do mar". Fixo énfase en que o documento só fai referencia a un informe de afección pola Lei de Costas, pero "non se refire en ningún caso á avaliación ambiental de acuicultura nin supón a súa ratificación".

Feijoo insiste en que hai informes
Porén, o presidente da Xunta reiterou este martes que existen "informes favorábeis" por parte dos ministerios de Medio Ambiente, Medio Rural e Mariño (MARM) e mais de Fomento sobre o emprazamento dunha planta acuícola en Touriñán e instou o MARM a "respectar" as competencias do Goberno na materia.

"Dáme a sensación de que o ministerio por un lado emite informes favorábeis e polo outro critica os propios informes que emite", declarou Núñez Feijoo, quen engadiu que existen informes tanto de Costas como de Portos do Estado. "Temos os informes e temos unha sentenza do Tribunal Superior de Xustiza de Galicia", indicou referíndose á decisión do tribunal sobre a responsabilidade patrimonial en que incorrería o Executivo por anular o expediente de instalación da planta.

Feijoo cifrou en 30 millóns de euros a indemnización que lle debería pagar a Xunta a Pescanova. "Non quero, con diñeiro dos galegos, indemnizar unha empresa que ten dereito a facer determinadas instalacións e tampouco quero que as leve a Portugal", engadiu, tachando de "arbitrariedade" a decisión do bipartito de "non autorizar unha instalación que tiña todos os permisos".


5/5 (1 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: