Vieiros

Vieiros de meu Perfil


Edición xeral

RSS de Edición xeral
CONFLITO DE MASSÓ

A lonxa de Cangas convértese nun parlamento

O Foro Social, que se opón á construción dun porto deportivo, organiza xornadas abertas para debater sobre o conflito xerado no municipio.

Redacción - 12:50 28/08/2009
Tags: Cangas Massó

O conflito pola construción dun porto deportivo en Cangas tamén se transforma en debate de ideas. Un exemplo é a programación do Foro Social que comeza esta fin de semana. Dende esta plataforma, que se opón ao proxecto urbanístico, consideran crucial este intercambio de ideas antes de que o vindeiro 11 de setembro se produza o paro da frota de baixura de toda a ría de Vigo.

A primeira mesa redonda terá lugar este venres ás 19 horas na lonxa da localidade.  Co título de “Massó: que se pode facer legalmente?” disertarase sobre as leis portuarias, urbanísticas, o dominio público e as competencias das diferentes administracións.

O domingo o debate, tamén ás 19 horas, vai xirar arredor do seguinte lema: “Massó: a organización cidadán diante dos abusos do capital”. Na mesma mesa, segundo afirman os organizadores, vaise discutir o fenómeno da “marbellización” de Cangas.

O martes terá lugar outra mesa co título de “Massó: recursos pesqueiros e emprego”. Na mesma avaliarase o posíbel impacto das obras do porto deportivo na actividade pesqueira e marisqueira. O xoves, día 3, tócalle quenda a “Massó, espazo público e ecoloxía”. Finalmente, o sábado 5 rematarán os encontros na lonxa cun debate que leva por lema “que facer en Massó”.

Dende o Foro calculan unha duración de dúas horas para cada debate, con quendas para a intervención de todos os asistentes, para logo consensuar un posicionamento común sobre os diferentes temas tratados.
 


5/5 (15 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: