Vieiros

Vieiros de meu Perfil


Edición xeral

RSS de Edición xeral
DENUNCIA DE ECOLOXISTAS EN ACCIÓN

Os recortes da Xunta en materia de prevención de incendios poñen en perigo os montes

Alertan de que o executivo prima a inversión en medios de extinción sobre a propia prevención e exixen unha mellor planificación e xestión forestal.

Redacción - 13:10 22/07/2010

A extinción dos incendios é máis rendíbel en termos de publicidade que a propia prevención. Esta é a causa que segundo Ecoloxistas en Acción explica que as administracións, entre as que nomea a Xunta de Galiza, primen a inversión nos medios de extinción en detrimento dunha planificación seria que parta da xestión forestal e da realización de repoboacións ou plantacións con especies que favorecen a propagación do lume.

Nun informe que titulan Luces e sombras da loita contra os incendios forestais, os ecoloxistas analizan a política forestal posta en marcha polo goberno español e o das comunidades autónomas nos últimos dez anos. Segundo os seus datos, Galiza segue a encabezar as estatísticas de incendios forestais na última década, se atendemos á superficie afectada e ao número de incendios, coa excepción dos anos 2003 e 2005, que coincidiron con dous grandes incendios no Estado Español (en Estremadura e Andalucía). En Galiza quéimase, ano tras ano, aproximadamente o 50% da superficie total que arde en todo o Estado e rexistra o 40% de todos os lumes.

A extinción vende máis
Con todo, segundo explicou o coordinador das campañas contra incendios do colectivo, Theo Oberhubert, a política da Xunta de Galiza non atende a prevención. Segundo informou, os pasos dados polo Goberno de Alberto Núñez Feijoo van precisamente na dirección contraria: “a extinción vende máis ante a opinión pública que a prevención”, dixo ao tempo que subliñou que unha planificación forestal responsábel sería moito máis decisiva á hora de combater a vaga de lumes que cada verán arrasa os nosos montes.

Ademais das altas temperaturas e da falta de xestión forestal, Ecoloxistas en Acción debulla as principais causas dos incendios da última década, entre as que subliña as queimas agrícolas, as queimas para a obtención de pastos e os intereses urbanísticos. Asemade, lembran que algúns dos grandes incendios dos últimos anos favoreceron recualificacións con intereses urbanísticos. Trala súa análise, o colectivo pide que as administracións asuman de xeito urxente a necesidade de reducir o número de lumes e adoptar medidas extraordinarias para acabar coas principais causas dos incendios forestais.


4/5 (6 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: