Vieiros

Vieiros de meu Perfil


Edición xeral

RSS de Edición xeral
SEGUNDO UN INFORME DA FAO

O 80% dos recursos pesqueiros mundiais están esgotados

Este organismo alerta de que máis da metade das poboacións comerciais de peixes mariños están sendo totalmente sobreexplotadas.

Redacción - 11:35 04/03/2009

Unha vez máis, os organismos internacionais fanse eco do perigo que corren as especies mariñas a nivel mundial. Foi na última edición do Estado Mundial da Pesca e da Acuicultura (SOFIA, nas súas siglas en inglés), que publica a ONU. Nel advirten da necesidade de aplicar prácticas pesqueiras responsábeis de forma máis xeneralizara e recomendan a ampliacións dos plans de xestión actuais para incluír estratexias que fagan fronte ao cambio climático.

Esgotamento de especies
O informe asegura que as zonas con máis proporción de poboacións pesqueiras explotadas son o Atlántico nororiental, o Océano Índico Occidental e o Pacífico noroccidental. Sobre os niveis, alerta de que máis da metade destas poboacións (52%) están plenamente explotadas e, en consecuencia, producen capturas próximas aos seus límites máximos sostíbeis, sen posibilidade algunha de aumentar. Ademais, outro 28% están sobreexplotadas, o 8% esgotadas e un 1% en recuperación logo do seu esgotamento.

Cambio climático
Outro dos grandes problemas para a pesca mundial, ademais da sobreexplotación, son os efectos do quencemento global. O estudo informa de que o cambio climático está a modificar a distribución das especies mariñas; os peixes de augas máis mornas desprázanse cara os polos e experimentan cambios na produtividade e no tamaño do seu hábitat. Ademais, estes cambios afectan á estacionalidade dos procesos biolóxicos, alterando as redes alimentarias mariñas.

Emisións de carbono
Ademais, a propia actividade pesqueira contribúe ás emisións de gases de efecto invernadoiro durante as súas operacións (transporte, procesado ou almacenamento de peixe) o que tamén ten consecuencias nas propias especies. A estimación é que a relación entre o combustíbel e as emisións de CO2 é de uns tres teragramos de dióxido de carbono por cada millón de toneladas de combustíbel empregado. A FAO pide, neste eido, unha mellor xestión para aumentar o rendemento do gasóleo para o sector.

Moitas embarcacións
Doutra banda, o SOFIA cualifica como un dos problemas graves para a pesca actual, o exceso de capacidade, é dicir, a suma de demasiadas embarcacións e tecnoloxías pesqueiras. A flota motorizada mundial ascende a preto de 2,1 millóns de barcos e a súa inmensa maioría (90%) mide menos de 12 metros de eslora. Mentres, outras 23 mil embarcacións son industriais e de gran tonelaxe. Con todo, descoñécese a nacionalidade de milleiros delas, unha categoría descoñecida que aumentou nos últimos anos malia os esforzos por eliminar a pesca ilegal a nivel mundial.


Ligazóns

3/5 (2 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: