Vieiros

O xuíz da Audiencia Nacional, Baltasar Garzón, emitiu este xoves unha nova providencia na que pide máis información para coñecer o paradeiro das case 200 mil vítimas da Guerra Civil, cuxos nomes e posíbeis paradeiros lle fixeron chegar varias asociacións da memoria histórica e de familiares de desaparecidos.

No escrito, o maxistrado estende a súa petición a diferentes organismos estatais, entre eles os Tribunais Republicanos de Madrid, creados "durante a defensa da capital de España na Guerra Civil (Xulgado de Urxencia, Xulgado Especial da rebelión militar, Tribunal especial de Espionaxe e Alta Traizón e os Tribunais/Xulgados Populares)". Garzón adoptou esta decisión despois de que o director do Arquivo Xeral da Administración lle comunicase que a información que lle tiña reclamado a comezos de setembro, atopábase en fondos documentais de nove institucións distintas.

Vólvelle exixir información á Conferencia Episcopal
Ademais, neste seu escrito Garzón vólvelle exixir á Igrexa, que colabore na identificación dos desaparecidos, despois de que a Conferencia Episcopal lle contestase ao xuíz, hai dúas semanas, que non é a institución competente para ofrecer estes datos.

Listado único de desaparecidos
Garzón pediulle tamén ás asociación da memoria histórica e de familiares de desaparecidos, que a semana pasada presentaron un censo don 143.353 nomes, que aporten, no prazo de sete días, unha "listaxe única" para que non existan "identidades repetidas". Transcorrido este prazo e "cumprido o requerimento", sinala o maxistrado, el mesmo resolverá se se declara competente ou non para investigar os feitos denunciados.