Vieiros

Vieiros de meu Perfil


Canal Verde

Xestionado pola Federación Ecoloxista Galega e Vieiros
RSS de Canal Verde
Informe 'Destrución a toda Costa 2008'

Ladrillo e contaminación zoupando "ao puro estilo mediterráneo"

Greenpeace peneira polo miúdo as principais agresións á costa do país, advertindo do "negro futuro" do litoral se non se frea a degradación urbanística.

Redacción - 15:15 02/07/2008

Non chega aos estremos doutros puntos do Estado, como a Comunidade Valenciana ou Murcia, pero as agresións á costa en Galiza aceléranse nos últimos anos, segundo advirten desde o colectivo ecoloxista Greenpeace. No informe Destrución a Toda Costa 2008 realizan unha análise dalgúns dos problemas máis graves, peneirando as principais agresións, desde as macrourbanizacións até a planta de Reganosa.

"Os últimos anos non foron os mellores para a costa galega", opinan desde Greenpeace, advertindo de que despois da marea negra do Prestige acelerouse outra marea, "a gris do cemento e formigón, que invadiu o litoral galego de urbanizacións ao máis puro estilo mediterráneo". Os ecoloxistas quéixanse especialmente dos proxectos de recualificación que queren levar adiante numerosos municipios, "pretendendo edificar unha cantidade similar de vivendas ás que se construíron xa en toda a historia de Galiza".

Algún "bo sinal" pero "insuficiente"
O decreto que limitou durante dous anos a construción nos 500 metros desde a liña de costa, a adaptación á Lei do Solo dos plans de ordenación municipais, e as denuncias ante a Xustiza dos municipios que basearon a sú política "nos feitos consumados", son xestos valorados positivamente por Greenpeace, aínda que cualificados de "insuficientes". Os ecoloxistas convidan o Goberno a "impedir que a costa galega perda a súa identidade". De xeito específico propoñen corrixir a eiva de normativa específica para a protección e ordenación da construción a pé de costa.

Greenpeace salienta a necesidade de que o executivo se comprometa con seriedade na solución dos problemas de contaminación das rías, definidos como "probablemente os máis graves de toda a península". Denuncian que a escasa ou moitas veces "nula" depuración das augas residuais, á beira da desorde no desenvolvemento industrial a pé das rúas, "deixaron pegada indisolúbel" no litoral do país. Tamén chaman á Xunta a deixar de permanecer "pasiva" ante os preocupantes episodios de contaminación continuados que realizan as industrias".

Os ecoloxistas refírense tamén de xeito específico ao plan de portos deportivos, sinalando que Galiza xa conta cunha das porcentaxes máis elevadas de amarres para embarcacións deportivas, dez veces por riba da de Italia por exemplo, país que ten á súa vez dez veces máis quilómetros de costa. Nese sentido, o colectivo propón que o Goberno introduza prácticas "máis sostíbeis" neste sector. Outro plan criticado é o da acuicultura, proxecto que os ecoloxistas consideran "moi agresivo" e do que piden que evite o impacto nos espazos naturais protexidos.


Ligazóns

3.2/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: