Vieiros

Vieiros de meu Perfil


Edición xeral

RSS de Edición xeral
Datos da Xunta para 2008

A previsión de crecemento do 2,8% é aínda esaxerada, din CIG e CCOO

UXT ve "lóxica" a rebaixa e considera que vai permitir medrar por riba da media do Estado e manter a creación de emprego.

Redacción - 09:41 09/04/2008

Os sindicatos CIG e CCOO coincidiron en cualificar como esaxerada a previsión de crecemento dun 2,8% da economía para o presente exercicio anunciada este martes polo conselleiro de Economía, Xosé Ramón Fernández Antonio, a pesar de que xa representa unha rebaixa de sete décimas respecto á previsión inicial.

"Dubido moito de que as previsións do conselleiro sexan reais", sinalou o secretario xeral da CIG, Suso Seixo, que recordou que o sindicato nacionalista xa discrepara co titular de Economía cando se elaboraron os presupostos para 2008. Neste senso, explicou que Fernández Antonio "non lle daba excesiva importancia" á desaceleración económica que se aveciñaba.

Nesa mesma liña, Maica Bouza, do gabinete técnico económico de CCOO, sinalou que xa manifestaran o pasado mes de decembro que non compartían a previsión da Xunta de que o PIB medraría este ano un 3,5% e, nesta ocasión, tamén consideran que a expectativa de crecemento do 2,8% "continúa a ser optimista de máis".

UXT, máis optimista

Pola súa banda, o secretario xeral de UXT, Xosé Antonio Gómez, considerou que "parece lóxica" a rebaixa na previsión de crecemento e tampouco deu por feito que se poida cumprir. "Se realmente fose do 2,8%, permitiríanos que Galiza siga a crecer por enriba da media de España e de Europa", apuntou, convencido de que o goberno español volverá rebaixar en xuño a súa previsión de crecemento, que actualmente é do 3,1%.


5/5 (1 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: