Vieiros

As "tentacións" no ámbito do urbanismo, froito das elevadas cantidades monetarias que se poñen en xogo nos negocios relacionados, explican o alto número de casos de "corrupción" que aparecen, na opinión do fiscal xefe do Tribunal Superior de Xustiza de Galicia, TSXG. Carlos Varela explicou este domingo para os micrófonos da RNE que as complicacións destes casos fan necesaria unha "especialización" na que debe afondarse tanto por parte da Fiscalía como dos corpos de seguridade.

Por este motivo, Varela é favorábel a que cara ao novo ano xudicial se pense na necesidade de que en Galiza existan xulgados especializados en cuestións de medio, urbanismo e patrimonio histórico. O fiscal xefe do TSXG cre posíbel que a Consellaría de Presidencia poida trasladarlle esa petición aos órganos xudiciais do Estado. Segundo Carlos Varela, a existencia destes tribunais axudaría a mellorar a "calidade xurídica" coa que se abordan os casos de corrupción urbanística.