Vieiros

No pasado mes de novembro aumentou o paro no país un un 4,34%. O número de desempregados rexistrados nas oficinas do INEM galegas subiu en 6.357 persoas en novembro, situándose a cifra total en 152.728 persoas.

Mais respecto ao ano pasado, Galiza diminuíu o seu número de parados en 5.962 persoas, un 3,76%; mentres que no resto de Estado se rexistrou un incremento de 71.309, un 3,52% máis. Tamén medou máis o paro entre os homes do que entre as mulleres, aínda que, coñecidos os datos de novembro, as mulleres sen emprego seguen a superar aos homes no país (hai 96.739 desempregadas polos 55.989 desempregados).

Aumentou en todos os sectores, sobre todo no servizos
Por sectores, o paro rexistrado subiu en todas as actividades, sobre todo nos servizos (3.631, chegando aos 85.798), seguido das persoas sen emprego anterior, que tamén medraron (en 1.243, chegando ás 23.441). Tamén medou o paro na construción (en 693 persoas, chegando aos 15.262 parados), na industria (582 parados novos, chegando aos 23.496) e a agricultura (208 persoas desempregadas, chegando ás 4.731).

Lugo, a provincia onde máis medrou o paro
Por provincias, en todas aumentou o paro o pasado mes. En Pontevedra rexistráronse 2.651 novos desempregados (un 4,81% máis); na Coruña houbo 1.794 novos desempregados (un 3% máis); en Lugo 1.164 (un 7,99%); e en Ourense, en 838 (un 4,4%).

Cos novos datos rexistrados, na Coruña hai un total de 61.522 desempregados; en Pontevedra 55.809; en Ourense 19.672; e en Lugo 15.725.

No conxunto do Estado Español, foron ao paro 45.896 persoas, polo que o número total de desempregados é de 2.094.473, un 2,2% máis que en outubro.