Vieiros

Segundo informou este mércores o concelleiro de Urbanismo de Ferrol, Anxo Mato, tras a mediación do concello nos últimos tres meses, os propietarios de tres das vivendas expropiadas no barrio de Canido chegaron a acordos coa empresa Albantur, que supoñen indemnizacións que multiplican por "catro ou por cinco" a cantidade estipulada con anterioridade.

O conflito se remonta ao ano 2003, cando Albantur presentou un proxecto de urbanización de luxo da Rúa poeta Pérez Parallé que obrigaba á expropiación e derrubamento de varias vivendas.

O Concello de Ferrol, gobernado polo Partido Popular e Independentes por Ferrol, procedeu á expropiación de 14 vivendas, cunha taxación equivalente ao prezo de catastro: entre 4.000 e 10.000 euros por casas duns 60 metros cadrados.

Desconfianza dos veciños
Segundo Mato, "o problema está pechado e xa hai un compromiso económico da empresa". Porén, os veciños sinalan que o conflito non está totalmente solucionado. O pacto aínda non está pechado nin asinado, segundo aseguran os afectados, que amosan a súa desconfianza á espera de ter o compromiso por escrito.

A rúa Poeta Pérez Parallé tardará ao redor de dous anos en se urbanizar, nunha zona onde se podería situar, ademais, o centro social que demanda dende hai anos a asociación veciñal de Canido.