Vieiros

Vieiros de meu Perfil


Edición xeral

RSS de Edición xeral
O SLG convoca unha manifestación en Ourense

Mobilízanse contra a zona de protección de aves da Limia

Esíxenlle á Consellaría de Medio Ambiente que reconsidere o proxecto dende o inicio, "dialogando e deixando participar no seu deseño ás comunidades afectadas".

Redacción - 09:30 18/08/2007
A manifestación será o vindeiro venres diante da delegación de Medio Ambiente de Ourense

A manifestación será o vindeiro venres diante da delegación de Medio Ambiente de Ourense

O Sindicato Labrego Galego (SLG) organizou este xoves unha nova asemblea en Xinzo de Limia, para tratar a "problemática" da declaración dunha Zona Especial de Protección de Aves (ZEPA), "debido á negativa da Consellaría de Medio Ambiente a informar ás persoas afectadas".

A asemblea decidiu convocar unha manifestación diante da delegación deste departamento en Ourense, o vindeiro 24 de agosto ás 11:00 horas. Dende o SLG convidan a toda a poboación da Limia a secundar a protesta, xa que "o problema, aínda que afecta de cheo á actividade agrogandeira, tamén é moi preocupante para diversos sectores económicos da bisbarra", tal como coutos de caza ou empresas de maquinaria, entre outros, afirman.

"Actitude arbitraria e escurantista"

Con este acto, o SLG quere denunciar "a actitude arbitraria e escurantista da Consellaría de Medio Ambiente no proceso de declaración de 10.000 hectáreas na comarca da Limia como ZEPA". Segundo a central sindical, a medida imporá graves restricións aos aproveitamentos agrícolas e gandeiros tradicionais da comarca limiá.

"Na delegación de Ourense descoñecían totalmente este asunto", afirman, polo que a principios de xullo solicitaron unha entrevista co director xeral de Conservación da Natureza para coñecer as razóns da consellería para levar adiante o proxecto, xuntanza que non se produciu.

"Plan coherente coa realidade socioeconómica"

A declaración da ZEPA esta amparada en diversas directivas europeas que obrigan á elaboración de plans de xestión coherentes coa realidade socioeconómica da zona a protexer. Segundo o SLG. "resulta esperpéntico que a argumentación científica para incluír 10.000 hectáreas se basee na definición da Limia como unha 'estepa', onde hai presenza ocasional dalgunha especie pouco frecuente de aves, e se teñan excluído zonas de veiga de maior interese faunístico e ornitolóxico".

É por isto que o Sindicato Labrego demanda -"ante a falla de diálogo e a pouca consistencia para esta actuación de tanta envergadura"- que se amplíe o período de alegacións, que está previsto remate o 2 de setembro. Ademais, esíxenlle á Consellaría de Medio Ambiente que reconsidere o proxecto desde o principio, "dialogando e deixando participar no deseño do mesmo ás comunidades afectadas".


3,33/5 (3 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: