Vieiros

Vieiros de meu (ou rexistrate)
 

Moravia

Moravia
    Malia todos os acontecementos do S.XX contrarios ao seu recoñecemento como identidade nacional diferenciada, Moravia mantivo viva a súa identidade dentro do sistema administrativo de Checoslovaquia, primeiro, e da República Checa, despois.

Moravia, herdeira do Imperio da Gran Moravia (S.IX-X), foi a grande esquecida no proceso de federalización de Checoslovaquia de 1969, polo que se crearon a República Checa e a República Eslovaca. O seu territorio, situado entre Bohemia (Chequia) e Eslovaquia, ficou integrado no da primeira a partir dese ano.

Os dereitos nacionais de Moravia foron de sempre ignorados polos checos, e os eslovacos -cos que os moravos manteñen unha maior afinidade histórica e cultural- non interviñeron nos momentos clave no seu favor. As promesas sobre a restauración da autonomía administrativa morava que realizaran os dirixentes disidentes checos durante a época comunista non foron cumpridas polo Goberno logo do desmantelamento do campo socialista.

A partir de 1993, cando checos e eslovacos crean pacificamente cadanseu Estado propio, a República Checa desenvolve unha política de centralización cultural e económica, enfocada a fortalecer a “unidade nacional”, que chega até os nosos días.

O movemento nacionalista moravo agrupouse en varios partidos, o máis importante o Hnutí za Samosprávnou Demokracii-Společnost pro Moravu a Slezsko (HSD-SMS, Movemento para unha Democracia Autónoma-Sociedade para Moravia e Silesia), que nas eleccións de 1990 foi o cuarto partido máis votado en todo o Estado.

Na actualidade, a formación que aglutina o voto dos que arelan maior autonomía ou mesmo a independencia é Moravané (Moravos), partido que goberna nas localidades de Hrabišín, Kosov, Hevlín, Pasohlávky e Tasov e conta cun total de 88 concelleiros en toda Moravia.

Segundo o último Censo de Poboación realizado polo Estado checo, de marzo de 2001, máis dun millón de habitantes (o 9,9 % da poboación) declarou ter unha nacionalidade diferente da checa. Desas, a terceira parte dixeron ser moravos. No entanto, esta cifra roldaba os 1,4 millóns no censo de 1991.

O Moravané argumenta que esta baixada tan elevada se produciu a raíz da manipulación do Estado e da presión dos medios de comunicación. Neste senso, traballa informando os moravos de cara á elaboración do novo censo, en 2011. O recoñecemento por parte do Estado da nacionalidade morava é un requisito estabelecido na Constitución para un hipotético proceso de independencia.

O dialecto moravo como lingua
Outro dos obxectivos de parte do Movemento moravo é o estudo e estabelecemento do moravo -do que non existen textos codificados e que está considerado un dialecto do checo- como lingua.

O Imperio da Gran Moravia, baixo o mandato do príncipe Mojmir I, foi a primeira nación das eslavas en se converter ao cristianismo, da man dos misioneiros bizantinos Cyril e Metoděj. O moravo antigo -filoloxicamente clasificado como “protoeslavo”- converteuse entón na cuarta lingua litúrxica da Cristiandade logo do latín, do grego e do hebreo.

Outra circunstancia que marcou a historia de Moravia produciuse na segunda metade do século XIX, cando centos de miles de homes e mulleres emigraron masivamente a América. A maioría instalouse nos EUA, principalmente en Texas, onde crearon importantes comunidades que serviron para conservar os seus sinais de identidade, entre estes, a fala.

Datos básicos

  • NOME:
    Morava/Moravě
  • XENTILICIO:
    Moravané/moravos
  • SUPERFICIE:
    28.500 km cadrados
  • POBOACIÓN:
    4.100.000 (estimada) / 380.474 (censo 2001)
  • DIVISIÓN:
    Rexións checas de Jihočeský kraj (parte oriental), Pardubický kraj (metade oriental), Vysočina (parte oriental), Jihomoravský kraj, Olomoucký kraj, Moravskoslezský kraj (compartida con Silesia) e Zlínský kraj
  • CAPITAL:
    Brno (histórica)
  • OUTRAS LOCALIDADES:
    Olomouc, Zlín, Znojmo

Política e Economía

  • ESTADO AO QUE PERTENCE:
    República Checa
  • AUTOGOBERNO:
    Repartido entre as rexións (Moravia non existe administrativamente). A de Moravia e Silesia (Moravskoslezský) é a que mellor conserva a identidade.
  • PARTIDOS E ASOCIACIÓNS:
    Moravané (partido nacionalista)
    Moravská Národní Obec (MNO, Comunidade Nacional Morava)
    MZÚS Moravské Zemské Ustavní Shromáždění (Iniciativa civil por unha Asemblea Nacional Morava)
  • INDUSTRIA:
    Téxtil (zapatos, coiro), maquinaria, agro (viño)

Entrevistas relacionadas

Entrevista a JiÅ™í Novotný

JiÅ™í Novotný, presidente do partido Moravané

"Os checos non lle poden ofrecer ao pobo moravo máis nada nunca máis"


Ver Moravia nun mapa máis grande

Lingua e Cultura

Fotos

Checoslovaquia entre 1928 e 1938 / Wikipedia Manifestacion en Brno Telč, a Venecia morava / Autor: iJuliAn2 Bandeira de Moravia Mapa histórico de Morava Mercado de Brno / Autor: Grabοwski

Todas as fotos | RSS


Fontes e máis información:
Citizendium | Enciclopedia Galega Universal | Encyclopædia Britannica | Eurolang | Eurominority | Europeana | Linguamón | Món Divers | Unión Europea | Wikipedia