Vieiros

Durante a fin de semana do 24 e 25 de xullo o Festigal, ademais dunha festa musical, será, como cada ano, un espazo aberto para o debate e o intercambio de ideas na capital de Galiza. A organización ten programadas tres mesas redondas que achegarán luz sobre diferentes cuestións.

A primeira terá lugar o sábado 24 ás 18.30 horas. Baixo a lenda de “Cultura libre? Dereitos de autoría, creación e cultura galega” tomarán a palabra Xabier Seixo de Reditegal; Francisco Alvarellos de 'A Casa da Música'; Pedro Silva, de Blogaliza; Marcos Paino, de Komunikando.net; e a parlamentaria do BNG Ana Luísa Bouza.

A continuación (ás 20 horas) outra mesa debaterá arredor deste título: A quen beneficia o esquencemento? A voltas coa memoria histórica?”. Na mesma estarán presentes os historiadores Xosé Carlos Garrido, Dionisio Pereira, Lourenzo Fernández Prieto e a escritora Carmen Blanco.

O domingo 25 de xullo, ás 18 horas, preséntase dentro do Festigal a III Acción Internacional da Marcha Mundial das Mulleres e a seguir, ás 18.30 horas, celebrarase a última mesa redonda que leva por título “Relixión, laicismo e sociedade no ano Xacobeo”. Na mesma participarán o historiador Francisco Carballo; a xornalista Comba Campoy; o ensaísta Andrés Torres Queiruga; o historiador Anselmo López Carreira; e a deputada nacionalista Carme Adán.

Pode completar a información na páxina do Festigal