Vieiros

A Asociación de Escritores en Lingua Galega (AELG) realizará o vindeiro 15 de xullo "un cortexo cívico e reivindicativo" en recordo do traslado dos restos mortais de Rosalía de Castro e para que se garanta o acceso ao Panteón dos Galegos Ilustres.

A AELG asegura nun comunicado que o Arcebispado de Santiago de Compostela ten a "intención" de pechar o Panteón despois do litixio que lle outorga a titularidade do mesmo.

Dentro das actividades organizadas, un tren, identificado como Follas Novas, partirá da estación da Matanza, á beira da casa de Rosalía, en Padrón, o xoves 15 de xullo ás 16,30 horas, para facer o traxecto deica Compostela.

Previamente, haberá unha concentración na colexiata de Santa María de Iria, no cemiterio de Adina, onde o presidente da AELG, Cesáreo Sánchez, informará do sentido destes actos, á vez que se lerá un poema de Rosalía de Castro.

Xa en Santiago, o cortexo sairá pola rúa do Hórreo cara á praza do Toural, primeira parada da comitiva, onde haberá unha lectura de tres poemas de Cantares Gallegos, e continuará pola praza da Universidade e pola praza de Cervantes, onde se lerán outros textos de Rosalía.

Finalmente, en San Domingos de Bonaval haberá unha audición do Angelus, de Massenet, e unha lectura de poemas de Follas Novas, intercalando actuacións de diversos grupos musicais e artistas participantes, para concluír o acto coa lectura dun comunicado reivindicativo da figura de Rosalía.

A lectura do texto recordará o 125º aniversario da morte da poeta e á vez reivindicará que se garanta o acceso ao Panteón de Galegos Ilustres. Ao respecto, a deputada do BNG Ana Pontón reclamou no Parlamento que o Goberno "garanta os seus usos civís e que sexa de titularidade pública".