Vieiros

Vieiros de meu Perfil


Edición xeral

RSS de Edición xeral
NA CORUÑA

A Inspección de Traballo culpa a Repsol da morte dun operario en accidente

Os traballadores da fábrica reiteran a petición do cese da dirección e anuncian que acudirán á vía penal.

Redacción - 10:40 17/06/2010

Inspección de Traballo da Coruña responsabiliza a Repsol dunha “infracción grave” en relación co accidente do pasado 15 de abril na súa refinaría da Coruña, que provocou a morte dun operario e feridas moi graves a outro. Mentres, o Comité de Empresa, xa co informe na man, reiterou a súa petición de cese da dirección e anunciou que recorrerá ante os tribunais.

Responsabilidade absoluta de Repsol
A acta de Traballo, difundida pola CIG, conclúe que “o procedemento de traballo que se estaba a utilizar, imposto por Repsol, e que se cumpriu en todos os puntos, non era correcto”, polo que se aconsella a empresa a mellorar a protección dos operarios nas súas instalacións.

O informe atribúe ademais á empresa a infracción de até catro artigos relacionados coa protección da saúde e a seguridade dos traballadores expostos a riscos derivados de atmosferas explosivas, que recolle a Lei de Prevención de Riscos Laborais e rexeita que, por parte dos traballadores, houbese un incumprimento dos puntos que estabelece a refinaría para estes traballos.

Cualifica os feitos de unha “infracción grave no seu grao máximo” e responsabiliza a Repsol que, “como titular da planta é quen estabelece o procedemento de traballo e as condicións nas que se debe de realizar”.

Cese dos responsábeis
O Comité de Empresa pediu, outra vez, o cese do equipo directivo da fábrica que “a día de hoxe, dous meses despois do accidente, aínda non tivo lugar”. Aseguran que a refinaría “segue en mans dunha equipa directiva responsábel dunha morte, dun ferido moi grave e de importantes danos nas instalacións e pregunta “até cando se manterá esta situación”.

Anuncian que a súa intención é levar á vía penal o procedemento por este accidente e aseguran que serán os xulgados quen “depuren as responsabilidades xurídicas dos directivos”.


5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: