Vieiros

O primeiro ministro belga, o democristián flamengo Yves Leterme, presentou esta quinta feira a dimisión ao xefe do Estado, o rei Alberto II, logo de que o Open VLD (liberais nacionalistas de Flandres) abandonasen o goberno de coalición de tan só cinco meses de vida, informaron os medios locais. O monarca deixou "en suspenso" a súa decisión sobre se aceptar ou non a dimisión.

"O rei e o primeiro ministro subliñaron, nas circunstancias actuais, o inoportuno que sería unha crise política, que provocaría un gran prexuízo ao benestar económico e social dos cidadáns, así como ao papel de Bélxica no plano europeo", informou a Casa Real nunha nota. Cómpre lembrar que o Estado belga substitúe o español á fronte da Presidencia rotatoria da UE a partir do 1 de xullo.

As tensións entre francófonos e flamengos debido a discrepancias insalvábeis sobre o réxime lingüístico na periferia de Bruxelas (BHV) provocaron esta nova crise de goberno. É a quinta vez que Leterme presenta a súa dimisión ao rei desde que gañou as eleccións en xuño de 2007. Ese ano renunciou dúas veces a formar goberno, ante a imposibilidade de reunir unha maioría cos partidos francófonos.

Excepcións francófonas en Flandres
Os flamengos exixen acabar coa excepción que representan as poboacións de Ache e Vilvoorde, ambas as dúas situadas en Flandres mais onde reside unha maioría francófona. Até o de agora, os francófonos desas localidades, aínda que viven en Flandres, puideron votar por listas francófonas nas eleccións, como os residentes en Bruxelas, única rexión bilingüe do país onde hai esa posibilidade.

• Análise: Flamengos e valóns, 179 anos de enfrontamentos