Vieiros

Despois de sumar día a día máis seareiros nas redes sociais (no facebook xa conta con máis de 650), a defensa do estaleiro da Banda do Río, en Bueu, chega en forma de vídeo ao youtube. Ao ritmo de “Meu amor é mariñeiro” de Fuxan os Ventos, a Asociación de Amigos das Embarcacións Tradicionais Os Galos e os colectivos que, canda eles, defenden a integración do estaleiro na ampliación do Museo Massó, quixeron amosar a importancia que tivo para Bueu a carpintería de ribeira.

A montaxe ofrece fotografías antigas dos areais da Banda do Río e de Pescadoira (tristemente con menos area na actualidade), das embarcacións tradicionais, da chegada da pesca ou da descarga do peixe, ademais da preparación para a súa venda nas esquecidas patelas. Ao tempo, imaxes do propio estaleiro de Purro fan reparar no papel que tiñan os carpinteiros nun pobo coma este, que como case todos os da costa, vivía case exclusivamente do que ofrecían os seus caladoiros. É, en suma, un novo chamado para facernos reflexionar sobre a necesaria recuperación daqueles elementos que xa se converteron, como o estaleiro de Purro, na testemuña dun tempo.

• Reportaxe: Última oportunidade para a carpintería de ribeira