Vieiros

A localidade portuguesa de Valença do Minho semella nas últimas horas un municipio do centro do Estado Español en festas. Centos de bandeiras españolas están penduradas en edificios e organismos públicos da vila para protestar contra a supresión da atención médica nocturna. Segundo os promotores da iniciativa, coa simboloxía queren “agradecer” o xesto do alcalde Tui que brindou o Punto de Atención Continuada deste municipio galego para que os veciños da outra beira do Miño poidan acudir polas noites en caso de urxencia.

Valença está sen atención médica entre as 24 horas e as 8 da mañá dende o pasado 28 de marzo. As autoridades portuguesas sinalan que o peche se produciu pola baixa demanda deste servizo. Canda o acto das bandeiras, o colectivo que demanda a volta do servizo nocturno a Valença tamén ten previsto celebrar unha marcha lenta de coches polas rúas.