Vieiros

Vieiros de meu Perfil


Máis Alá

Xestionado por Vieiros
RSS de Máis Alá
Mundo literario

Nace 2.0 Editora, "para un público que quere divertirse coa lectura"

Este xoves dáse a coñecer unha nova firma que pretende compaxinar a edición impresa coa dixital e relacionarse cos lectores a través da rede.

Redacción - 18:20 17/03/2010

Este xoves preséntase publicamente unha nova editorial: 2.0 Editora. A súa aspiración é converter o lector en protagonista, para o que aproveitará as posibilidades das novas tecnoloxías e das redes sociais. Segundo explicou a editora, Eva Rivas, as persoas lectoras están moitas veces "esquecidas" polas editoriais tradicionais, polo que o obxectivo de 2.0 será achegarse a elas, ofrecéndolles contidos atractivos, "para un público que pretende divertirse coa lectura".

No acto de presentación, o xoves ás 20 horas na Libraría Couceiro, en Compostela, daranse a coñecer os primeiros libros editados por 2.0 en dúas coleccións: Mundos, de narrativa, ofrece as traducións de Guía do autostopista galáctico, de Douglas Adams, e Sen novas de Gurb, de Eduardo Mendoza, ambos os dous relacionados coa ciencia-ficción. A outra proposta, Folcsonomías, dedicada ao ensaio, estréase c'Un idioma preciso, de Xusto Rodríguez Río.

Segundo explicou Rivas, 2.0 Editora ten a idea de "sacar adiante edicións dixitais e que a nosa web sirva de plataforma" para entrar en contacto co público, "na liña da web social". Pretende publicar contidos de diferentes materias de autores e editoriais que sintan a necesidade de achar distribución a través da rede, e mediante o tipo de licenza que escollan.

Despois dos seus tres primeiros lanzamentos, a editorial xa está a traballar en máis publicacións, "sobre todo traducións de autores coñecidos de literatura lixeira e atractiva", cubrindo un oco do que se está a facer no mundo editorial galego.

En calquera caso, a edición dixital ábrese como unha das grandes oportunidades para a nova editora, que comercializará os seus produtos a través da web ao tempo que nas librarías tradicionais.


5/5 (13 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: