Vieiros

Vieiros de meu Perfil


Máis Alá

Xestionado por Vieiros
RSS de Máis Alá
Entrega o próximo 4 de marzo

Luar na Lubre e Carlos Bau galardoados nos XIV Premios da Música

Gañadores respectivamente dos premios a nivel estatal na categoría de mellor álbum de música tradicional e mellor canción en galego.

Redacción - 17:45 17/02/2010
Carlos Bau

Carlos Bau

O traballo "Ao vivo", de Luar na Lubre, mereceu o premio ao mellor disco de música tradicional, na categoría correspondente da XIV edición dos Premios da Música. O grupo coruñés competía polo galardón co tamén galego Carlos Núñez e co vasco Kepa Junkera. Trátase dun dobre CD e DVD que xunta as pezas que a formación herculina gravou en xaneiro de 2009 no Teatro Colón d'A Coruña na conmemoración dos seus máis de vinte anos de labor.

Por outro lado, o tema titulado "Nada", de Carlos Bau, foi merecedor do premio á mellor canción en galego. Bau rivalizaba polo recoñecemento fronte á peza "A Nosa Estrela", de Eva Carreras e Fasero, e "Madama", de Guadi Galego, Pedro Pascual e Rosa Bugallo. Quedaron sen premio o director e compositor Ros Marbá e a Real Filharmonía de Galicia, que con '5 Melodías sobre poemas' de Paul Valéry competían no apartado de música clásica, sendo o galardón finalmente para Zulema de la Cruz.

Quimi Portet gañou o apartado de mellor canción en catalán, por 'Homes i dons do cap dret', e Ruper Ordorika por 'Haizea garizumakoa', no apartado de canción en éuscaro. Outros gañadores destes galardóns que reparten premios a nivel estatal foron o grupo Fito & Fitipaldis (mellor álbum rock), Zahara (autor revelación), Fangoria (mellor disco pop), Javier Corcobado (mellor álbum alternativo) ou Carles Benavent (mellor disco jazz). A gala oficial de entrega dos premios será o vindeiro 4 de marzo no Teatro Häagen Dazs Calderón, en Madrid.


4,44/5 (9 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: