Vieiros

Vieiros de meu Perfil


Máis Alá

Xestionado por Vieiros
RSS de Máis Alá
Esixe 243 euros aos colectivos convocantes

Un maratón solidario a prol de Haití topa co obstáculo da SGAE

Malia que o sismo foi hai menos de quince días, a Sociedad General de Autores di que a posíbel exención de pago hai que solicitala un mes antes do concerto.

Redacción - 17:45 27/01/2010

Coas implacábeis burocracias da Sociedade General de Autores y Editores (SGAE) non hai xustificación posíbel. Así o veñen de comprobar sete asociacións veciñais de Cambre, organizadoras dun maratón solidario a prol do pobo haitiano. A onda de solidariedade co país caribeño logo da catástrofe provocada polo terremoto a mediados deste mes de xaneiro non pareceu conmover os ríxidos mecanismos da entidade xestora. Así, os colectivos quéixanse de que a SGAE lles esixa 243 euros pola organización dunha festa que terá un carácter "totalmente altruísta" e co que os colectivos pretenden recadar fondos para axudar os cidadáns de Haití.

Por riba, á hora de expoñer a motivación solidaria coa fin de reclamar a exención do pago, as asociacións toparon coa inflexíbel burocracia: a SGAE responde que a solicitude debe facerse necesariamente cun mes de antelación ao concerto. Mais, subliñan os colectivos, evidentemente, hai un mes nin sequera acontecera o terremoto. En todo caso, os colectivos implicados, logo de expresar a súa "indignación" e denunciar a "nula sensibilidade" da SGAE, rañaron os petos e abonaron os 243 euros. Paradoxalmente, a SGAE anuncia esta semana na portada da súa web que se solidariza "coas vítimas do terremoto de Haití" e convida os seus socios a facer achegas a unha conta aberta a tal efecto.

De calquera xeito, o próximo sábado 30 de xaneiro terá lugar o evento no Concello de Cambre. Serán quince horas seguidas, desde as 12h30 até as 3h30 da madrugada. As organizacións convocantes son a Asociación Sociocultural de Mulleres d'A Barcala, Asociación de Veciños de Pravio e Cela (Avepace), Asociación de Veciños A Unión de Brexo-Lema, Asociación de Veciños O Cruceiro de Bribes, Asociación de Veciños de Santa María de Vigo, Asociación de Veciños Torre de Andeiro e Asociación de Veciños de San Lourenzo A Pista. Colaborarán medio cento de voluntarios e a festa conta co apoio de ducias de veciños e empresas colaboradoras. Os artistas que actuarán de balde, entre outros, a Banda de Música Sementeira de Cambre, a Orquestra Fania Blanco Show, o Dúo Ciclón, as orquestras París de Oza, Montes e Alarma ou o Mago Pablo. Haberá tamén pantalla grande para ver o Deportivo da Coruña furar a porta do Real Madrid na sesión futboleira da tarde-noite sabatina.


5/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Representantes das asociacións veciñais de Cambre amosan os recibos logo de pagar na delegación coruñesa da SGAE
Representantes das asociacións veciñais de Cambre amosan os recibos logo de pagar na delegación coruñesa da SGAE