Vieiros

O temporal de vento e auga trouxo complicacións na madrugada deste mércores ao xoves. As comarcas costeiras foron as máis afectadas polos fortes refachos que obrigaron aos servizos de emerxencias a traballar arreo en pequenas incidencias

Os principais problemas foron tellas caídas e árbores e pequenos desprendementos de terra nas estradas. Os cortes de luz foron constantes tamén en localidades da Costa da Morte, na vila de Betanzos e incluso nalgunhas zonas de Compostela como os barrios de Salgueiriños e San Lázaro.

Na Costa da Morte as incidencias foron numerosas. En Cee a intensidade do vento afectoulle de cheo ao tellado do centro comercial “Finisterrae” que tivo que ser acordonado polos servizos de emerxencia.

En Vigo a autovía A-55 estivo cortada durante unha hora por mor da caída dun eucalipto e na comarca Protección Civil traballa para sacar polas de árbores das estradas. Similares incidencias aconteceron en comarcas costeiras pontevedresas como a de Arousa.

Na provincia de Lugo hai numerosas estradas polas que hai que circular con precaución debido á presenza de árbores nas vías. Na Terra Chá as abundantes precipitacións deixaron importantes bolsas de auga nas estradas.