Vieiros

Nalgún espazo entre a lenda e a historia está a verdade sobre Eugénio Tavares. "O fillo do mar" porque, logo de perder a seus pais no naufraxio dun buque diante da costa de Cabo Verde, foi adoptado aló por unha familia de orixe portuguesa.

O relato comeza coa singradura do Guadalupe IX, un barco que saíu en novembro de 1865 desde o porto da Coruña levando emigrantes cara a Bos Aires. Na proximidade das costas caboverdianas prodúcese o naufraxio. Morren máis de medio cento de persoas e o resto salva a vida grazas a uns illotes deshabitados no contorno. Socorridos por veciños da illa da Brava, entre os náufragos hai un meniño de colo sen pais, "O fillo do mar".

Un equipo dirixido por Luís Menéndez, xornalista da TVG, investigou as pegadas que insinúan a orixe galega de Eugénio Tavares arredor desta historia. O traballo, en forma de documental audiovisual, foi presentado xa durante a fin de semana no Concello de Burela, aproveitando a numerosa comunidade caboverdiana aló asentada. Este luns, ás 00h25 da noite, é a estrea na primeira canle da emisora pública.