Vieiros

Vieiros de meu Perfil


Edición xeral

RSS de Edición xeral
Día de Acción Global contra o Cambio Climático

Mudemos o sistema, non o clima

A cita "oficial" dos gobernos en Copenhague avanza lentamente. Unha situación que contrasta coas vizosas alternativas a prol dun futuro "sustentábel e socialmente máis xusto" que abrollan da sociedade.

Redacción - 10:00 12/12/2009


(actualizada 14h)
"Mudemos o sistema, non o clima". Atrás dese lema mobilizáronse este sábado en Santiago de Compostela diversos colectivos sociais organizados arredor da bautizada Rede Galega Anticapitalista. Unha actividade promovida no Día de Acción Global contra o Cambio Climático e en defensa dos tres "c" do principio de xustiza climática: contracción (redución) das emisións mundiais; converxencia nas emisións por habitante; e compensación dos gobernos e transnacionais que son responsábeis da crise climática aos que sofren as súas consecuencias.

"A mudanza climática é a cara máis preocupante dunha crise socioambiental global que afunde as súas raíces no produtivismo e no consumismo", expoñen, "un problema cuxos principais responsábeis son os gobernos e as transnacionais dos países enriquecidos, xunto coas institucións internacionais do Banco Mundial, o Fondo Monetario Internacional e a Organización Mundial do Comercio, mais que golpea primeiro e máis forte ás persoas máis pobres". "Queda xa pouco tempo para previrmos unha mudanza climática catastrófica, o Cumio do Clima de Copenhague non pode fracasar: é urxente acadar un acordo legalmente vinculante de redución das emisións de dióxido de carbono (CO2) e outros gases causantes do cambio climático que substitúa o Protocolo de Quioto a partir de 2013", afirma a Rede no seu manifesto.

Klimaforum, a cita alternativa en Copenhague
Fronte ás burocracias, tensións e escasos e lentos compromisos que abrollan da conferencia oficial, de acceso restrinxido a xefes de Estado e funcionariado das diversas delegacións internacionais, contrasta a proposta do Klimaforum. Trátase dun evento de libre acceso promovido polo movemento ecoloxista danés e apoiado por diversos colectivos internacionais que se celebra de xeito paralelo ao cumio oficial apadriñado polas Nacións Unidas.

  "A clave é fomentar que acontezan cambios no xeito de pensar e promover que a sociedade faga abrollar novas formas de organización", expoñen. Nese contexto de pensamento chaman a "recoñecer" que non existe ningunha tecnoloxía máxica que conduza á saída da crise climática. "Nin nuclear, nin biocombustíbeis, nin almacenamento de CO2...: estas solucións xeran á vez problemas máis grandes dos que orixinalmente resolven", advirten. Por este motivo, subliñan a necesidade dun xiro "radical" en favor da sustentabilidade da sociedade.

Nese escenario, o debate de solucións "autenticamente sustentábeis" baséase en priorizar o aforro e o uso eficiente da enerxía, as tecnoloxías renovábeis limpas e seguras, a promoción dunha menor emisión de gases que favorecen o efecto invernadoiro e, en consecuencia, que non fomenten o uso de combustible fósil; métodos baseados na agronomía, que fixan o carbón á terra, que reducen o uso de fertilizante químicos e que non constitúan unha ameaza para os ecosistemas, o clima e a biodiversidade; garantía sobre o uso sustentábel dos recursos para poder aproveitalos dun xeito xusto e equitativo e un sentido crítico "sobre o enfoque obstinado ao redor dos bens de consumo, que impregna á sociedade global de hoxe".


5/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: