Vieiros

Vieiros de meu Perfil


Máis Alá

Xestionado por Vieiros
RSS de Máis Alá
Libro de conversas

“O grupo Sargadelos estase vindo abaixo dunha maneira orientada”

Isaac Díaz Pardo denuncia que hai un interese político en destruír a parte cultural e de memoria histórica do proxecto.

Moisés Álvarez - 17:20 11/11/2009

Oitenta e nove anos de vida dan para unha entrevista longa e substanciosa, aínda máis se é a vida dun intelectual tan activo e implicado na sociedade, a cultura e a economía galegas como Isaac Díaz Pardo. O xornalista Xosé Manuel del Caño conversou con el no libro O Contencioso de Sargadelos (Edicións Linteo), que este mércores se presentou en Santiago. A biografía de Díaz Pardo e a súa visións da realidade e a historia de Galiza ocupan boa parte da entrevista, pero o tema central remite á actualidade: a perda do control do proxecto que axudou a fundar.

A pesar da súa idade, Díaz Pardo ten máis interese en falar do presente e do futuro que en perderse na nostalxia. Por iso comezou a falar aclarando que a entrevista se realizou hai dous anos e que “neste tempo pasaron moitas cousas”. Dos últimos anos, o que lle parece máis relevante é que “todo o grupo Sargadelos estase vindo abaixo dunha maneira orientada, polo que supoñemos que aí hai algo máis que a misión de apropiarse do grupo”. Denunciou que existe un propósito de acabar coa parte do proxecto relacionado coa cultura e a memoria histórica: “hai un interese político en destruír esa obra, como hai en Madrid intereses para botar abaixo a lei de memoria histórica”, afirmou. “Destruíron toda a parte cultural do proxecto, e agora están destruíndo todas as empresas”.

Expediente xudicial
Díaz Pardo amosouse moi descontento coa actual xestión de Sargadelos, que comparou cunha libraría que administra alguén que non sabe de libros: “vaise abaixo”, dixo. “O poder xudicial comunicoume que vai abrir un expediente para saber que hai detrás da situación do grupo”, anunciou Díaz Pardo, que ten por obxectivo que o control de Sargadelos recaia nunha fundación ou nos seus fillos Camilo e Xosé Díaz.

A que non ten data é a fundación que preservaría o legado de Isaac Díaz Pardo. Anunciáraa hai un ano o entón conselleiro de Presidencia da Xunta, Xosé Luis Méndez Romeu, e estaba previsto que tivese a súa sede no Instituto Galego da Información (IGI). Pero o novo goberno aínda non se pronunciou ao respecto. O propio Díaz Pardo comprende que neste momento se aparque o proxecto: “o problema é o diñeiro”, apuntou.

Movemento de solidariedade
O editor Manuel Ramos definiu o libro como “as memorias que Díaz Pardo quixo contar”, nas que non evita entrar en temas polémicos. Entre as afirmacións que verte na conversa, Xosé Manuel del Caño destacou a de que “chegou a interceptar unha carta que demostra que había unha trama para acabar coa súa vida”.

“Estou convencido de que se nesta terra houbese moitas persoas emprendedoras e comprometidas como el, Galiza sería unha gran potencia”, sinalou o entrevistador. Anunciou que de forma inmediata se vai poñer en marcha un movemento solidario con Díaz Pardo, “ao que agardamos que se sumen máis de 200 intelectuais galegos”. O obxectivo é que ao longo dun ano se vaian publicando artigos en diferentes medios de comunicación que defendan a figura e o labor do histórico galeguista, para logo recollelos todos nunha nova publicación que se editaría o vindeiro ano.


4,76/5 (17 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: