Vieiros

"Segue habendo moito machismo no tratamento do deporte", dicía Eva Castro nunha entrevista de Vieiros a comezos de ano. E o tempo veulle a dar a razón. O grupo parlamentar do BNG denuncia as posíbeis discriminacións arbitrarias nas axudas a deportistas galegas de elite, e en concreto a falta de apoio institucional á ciclista Eva Castro.

Castro compite en ciclismo de montaña e, na súa traxectoria, xa se converteu nunha das figuras máis internacionais da historia deste deporte en Galiza. Actualmente traballa para o equipo BMX, mais recibiu a negativa da Xunta de esponsorizala cos 12 mil euros que, até o de agora, lle facían posíbel os seus desprazamentos ás probas da Copa do Mundo.

O BNG rexistrou unha iniciativa parlamentar exixindo o mantemento desta axuda e subliñando que Eva Castro "paseou o nome de Galiza coas mellores da especialidade en Europa, América ou Australia" e que "tivo unha importante repercusión en numerosos canais deportivos de televisión". Os nacionalistas entenden que "esta é a triste realidade do deporte galego en xeral e das mulleres en particular, que teñen que loitar non só contra os seus rivais deportivos, senón tamén contra a falta de apoio da Administración galega actual, que prefire contratar deportistas de fóra como imaxe do Xacobeo (como Casillas, Nadal ou Gasol), mais teñen abandonados aos deportistas do país".

• Anterior: Os homes reciben a maioría das axudas ao deporte da Xunta

• Entrevista a Eva Castro: "Segue habendo moito machismo no deporte" (14/03/09)