Vieiros

En De Outra Margem xúntanse cinco músicos galegos e portugueses para recuperar temas do folclore dos dous lados da raia. Lorenzo Suárez, Luis Lechuga, Carlos Villanueva e Gustavo Domínguez uníronse a Abílio Santos para recoller temas case esquecidos e darlles unha nova vida con voz e instrumentación acústica: cavaquinho, contrabaixo, frautas, concertina, harmónica, adufe...

A banda de espírito transfronteirizo levará este outono os seus temas de xira por vilas e cidades de Portugal, ao igual que outras dez bandas galegas: Aló Django, Banda Potemkin, Bukowski Blues Trío, Carmen Dor, Coanhadeira, Lamatumbá, Modulok Trío, Portrait, Som do Galpom e Son+D2. En total serán 25 concertos en Porto, Chaves, Aveiro, Évora, Águeda, Amarante, Estarreja, Fundão, Ovar, Tondela e Torres Novas.

Os concertos son o resultado do intercambio entre a Rede Galega de Música ao Vivo e a rede OuTonalidades. É o segundo ano que se produce este acordo de colaboración entre a Agadic e a Orfeu Associação Cultural, que permitirá tamén que seis bandas lusas actúen en Galiza. Comcordas, Olivetree, Samasati, Sofia Ribeiro, Taberna Revisitada e Uxu Kalhus estarán entre setembro e decembro en Bueu, A Coruña, A Laracha, Allariz, Ferrol, O Grove, Lugo, Melide e Ourense.