Vieiros

"Non sabemos se é que se prega ás manobras do PP de Madrid ou se é incapacidade política", afirmou a voceira e coordinadora de Acción Electoral do PSdeG, Mar Barcón, criticando a actitude do presidente da Xunta, Alberto Núñez Feijoo, arredor da actualidade sobre a posíbel fusión dunha caixa do país con entidades financeiras foráneas.

Barcón subliñou o carácter "prioritario" da defensa do capital financeiro galego e apelou ao "significado" que teñen tanto Caixanova como Caixa Galicia na actividade económica e social de Galiza. A deputada socialista atribuíulle o interese de Cajamadrid por Caixa Galicia a unha "estratexia política" concreta do Partido Popular.

"Non é rigoroso, nin serio, nin tolerábel que Feijoo diga que se vai tomar oito meses para reflexionar", dixo Barcón, quen engadiu que "parece que Rajoy se vai tomar menos tempo" ao vincular a postura de Cajamadrid cunha "decisión política" do PP e dos "intereses" da presidenta da comunidade autónoma madrileña, Esperanza Aguirre. Na opinión do PSdeG, o presidente fai unha "renuncia expresa ao protagonismo que lle corresponde a un presidente da Xunta".