Vieiros

Segundo denunciaron este luns representantes dos tres principais sindicatos e da Asociación Galega de Cooperativas Agrarias, existen actualmente en Galiza 50 granxas que se enfrontan a expedientes de embargo. Este é só un dos alarmantes datos ofrecidos polas asociacións gandeiras, nunha conferencia de prensa que lles serviu para anunciar os actos cos que continuarán as súas protestas contra a caída dos prezos do leite en orixe, entre os días 13 e 17 de xullo.

Nesta rolda de prensa tamén se afirmou que no que vai de ano pecharon mil explotación lácteas en Galiza e criticouse que moitas granxas non estean a cobrar o leite, o que as obriga a compensar cos seus aforros as perdas rexistradas durante os últimos meses. Ante este panorama, os representantes de sindicatos e cooperativas coinciden en que entre os días 13 e 17 de xullo, as cidades de Lugo e Compostela presenciarán "unha mobilización pola supervivencia", tal e como afirma o secretario xeral de Unións Agrarias, Roberto García.