Vieiros

Vieiros de meu Perfil


Galego.org

Xestionado por Vieiros
RSS de Galego.org
XUNTANZA DA MESA CON EDUCACIÓN

"Din que van escoitar a todos, pero realmente non buscan o consenso"

Segundo Callón, o conselleiro transmitiulles que aprobará un novo decreto aínda que non conte co respaldo de oposición, familias nin profesorado.

Redacción - 19:05 15/06/2009

"Cordial pero con moitos momentos de tensión". Así definiu o presidente da Mesa pola Normalización Lingüística, Carlos Callón, a xuntanza que mantivo este luns co conselleiro de Educación, Xesús Vázquez, e co secretario xeral de Política Lingüística, Anxo Lorenzo. "Dende a Mesa transmitímoslle o noso rexeitamento á derrogación do decreto actual", di Callón, e "quixemos saber que ían facer se non contaban co respaldo nin do BNG, nin do PSdeG, nin das familias ou do profesorado". Segundo explica, Vázquez asegurou que levarían igualmente adiante a proposta, polo que, ao entender da Mesa, "non buscan consenso ningún: falar con todos si, pero cremos que o conselleiro ten xa a proposta de decreto no caixón, polo que a pseudoconsulta aos pais, ademais de tendenciosa e sen rigor, non é máis que un paripé para xustificar unha imposición unilateral e sen diálogo dunha norma que vaia contra o ensino en galego".

Canto custarán as enquisas aos cidadáns?
Outra cuestión que preocupou aos dirixentes da Mesa pola Normalización é a do custe que terá todo o proceso iniciado por Política Lingüística. "Temos que saber canto están gastando nesta farsa", di Callón. Se ben os últimos datos publicados en prensa falaban de 198 mil euros, o conselleiro non quixo precisarlle esta cantidade aos responsábeis da Mesa. "Parécenos, ante todo, un despilfarro de diñeiro público e queriamos saber a canto ascendía: as contas non cadran, porque hai que ter en conta o custe de imprimir, distribuír, recoller e clasificar 330 mil formularios, uns gastos que nós estimamos en non menos de 800 mil euros".

Callón subliña que cunha cantidade coma esta se podería dar un "verdadeiro impulso á política educativa deste país" e insiste en que esas contas sexan públicas. "Nun tempo de crise coma este e no que enchen a boca falando de austeridade, como poden adicar tanto diñeiro a esta pseudoconsulta?", insiste, ao tempo que recorda que ao custe da enquisa en si hai que engadir os cartos adicados á campaña de publicidade que nos pasados días ocupaba as páxinas de diferentes medios de comunicación. Ademais, pregunta tamén polos criterios empregados para inserir esa campaña publicitaria en medios informativos.


Ligazóns

4,69/5 (16 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Os responsábeis da Mesa cren que o conselleiro xa ten unha proposta para o decreto do galego
Os responsábeis da Mesa cren que o conselleiro xa ten unha proposta para o decreto do galego