Vieiros

"Estás convidado maifrén, estás convidado meu ben", velaí un dos retrousos, neste caso de Lamatumbá, que poden escoitar no espazo web de Casa de Tolos. Os festeiros ourensáns, creadores do máis coñecido himno do licor café, protagonizan unha das peneiras de pezas audiovisuais coas que agasalla o estudio pilotado polo músico e produtor Segundo Grandío.

Con amplo despregue de cámaras e gorentosa calidade, a web fornece dunha ampla galería de traballos a pé de estudio e fóra del, do equipo da Casa de Tolos. Aló poden ver xa vídeos diversos de Pancho Álvarez, de Roi Casal, de Magín Blanco, Magín e Burgas Beat, das Tanxedoras, de Mitocondrias, e Carlos Childe Troupe. Todas gravacións en rigoroso directo expostas agora no universo multimedia.