Vieiros

Kargus Consultants é a empresa de investigación que será procesada pola xustiza francesa por entrar nos sistemas informáticos da asociación ecoloxista Greenpeace. O presidente da firma, Thierry Lorho, antigo axente dos servizos de información da DGSE, revelou nunha web -lereseignment.com- que fora o encargado de identificar en particular o financiamento da organización ecoloxista, para saber "quen son os xenerosos doadores".

"Asumo completamente a vixilancia do responsábel do Greenpeace, Yannick Jadot, mas gustaríame que a empresa EDF, que me encomendou a operación, tamén aceptase as súas responsabilidades", dixo Lorho. O responsábel de Kargus Consultants tamén recoñeceu que andar a espiar as actividades de Greenpeace era unha actividade ilegal, mais dixo entender que "desestabilizar o maior grupo europeo de enerxía e cometer acción contra as súas centrais nucleares" o era aínda máis.

O grupo de electricidade EDF, un dos principais produtores mundiais de enerxía nuclear -o que fai que os ecoloxistas se enfronten a el e desenvolven diversas actividades na súa contra- defendeuse, até o de agora da acusación, sinalando que a espionaxe non era tal, e estaba inserida nun contrato de estratexia asinado en 2006 coa Kargus Consultants.