Vieiros

Vieiros de meu Perfil


Máis Alá

Xestionado por Vieiros
RSS de Máis Alá
CERTAME DA RADIO GALEGA

Teatro Radiofónico: Peter Buckley, gañador por K.O.

O texto, escrito por Rubén Ruibal e César Candelas, obtivo os premios do público e do xurado.

Redacción - 09:20 25/03/2009



O gañador da terceira edición do Premio de Teatro Radiofónico do Diario Cultural foi o eterno perdedor Peter Buckley, o boxeador (con orixe real) ao que Rubén Ruibal e César Candelas lle crearon un mundo. Ese 'coleccionista de derrotas' derrotou por KO ás outras dúas obras, pois fíxose á vez co premio do público e mais co do xurado. Ruibal (gañador do Premio Español de Literatura Dramática do 2007 e do Álvaro Cunqueiro de 2005 por Limpeza de Sangue) e o historiador César Candelas (que escribe o blog +Dylan) coñecéronse no blog Brétemas de Manuel Bragado hai uns meses, discutindo nos comentario ao fío dun post sobre Dylan.

Dylan, autor de Hurricane, unha rabiosa peza sobre o boxeador Rubin 'Furacán' Carter, uniunos, e comezaron a escribir teatro a catro mans, enviándose engadidos que van construíndo os textos conxuntos. Peter Buckley non é a súa única peza e segundo Ruibal, van seguir escribindo xuntos no futuro.

Peter Buckley é un boxeador inglés, un auténtico perdedor que caeu derrotado en 296 dos 300 combates que disputou. Tan perdedor, que nin sequera é o peor boxeador da historia, recoñecemento que corresponde a Reggie Strickland. Buckley, perdedor entre os perdedores, retirouse en outubro de 2008 cunha vitoria aos puntos. Esa noticia foi o punto de partida da obra, na que o Peter Bucley ficticio ten un peor final.

O premio entregarase nunha gala no Teatro Rosalía de Castro da Coruña, o próximo 15 de abril, ao tempo que se presenta o libro-cd, editado por Xerais, que incluirá as outras dúas finalistas (O xou mas gou on de Eva Ferreira e Servizo de información de Paula Carballeira). O xurado, formado por Cándido Pazó, Cristina Domínguez, a actriz Flor Maceiras, Camilo Franco e Ana Romaní, salientou que se trata dunha historia "que emprega pautas do xénero negro, convertendo a o relato nunha translación radiofónica dun ambiente cinemátográfico".


5/5 (7 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: