Vieiros

Os membros da Plataforma pola Defensa da Ribeira Sacra desenvolven, este domingo ao mediodía no Pombeiro, en Pantón (Terra de Lemos), a carón do Sil (ollen no mapa a carón desta información), un acto de plantación de árbores autóctonas. E ao tempo, coa outra man, han asinar un documento de compromiso, para que o Goberno invista cartos na zona fronteiriza entre Ourense e Lugo, que consideran está un bocado abandonada.

Un pobo que precisa servizos básicos e que coiden a súa contorna natural
Participarán membros desta Plataforma dos concellos de Chantada e Monforte, varios empresarios de turismo rural e grupos ecoloxistas, no que pretende ser un acto aberto e participativo para que os veciños das aldeas dos Peares, Nogueira, Cibrisqueiros, Pantón e Pombeiro poidan ter voz ante os seus representantes políticos no Goberno.

Contra as navalladas nos canóns do Sil
Ademais disto, a Plataforma xúntase para pedirlle ao Goberno entrante que paralice os proxectos de concesións hidroeléctricas en Peares II, Santa Cristina, Ponte Novo, Santo Estevo II e San Pedro, que, segundo salientan dende este colectivo, só están encamiñados a "destruír a fauna e a flora, sen esquecernos do dano ambiental que vai ser regresivo".