Vieiros

Hai apenas un mes, o Tribunal de Xustiza das Comunidades Europeas resolveu ao respecto dunha petición de coñecemento da localización exacta de parcelas de experimentación transxénica no municipio de Sausheim. A solicitude fora realizada polo cidadán francés Pierre Azelvandre. A resolución xustifica a esixencia de facérense públicos os lugares de cultivo transxénico por motivos de "protección da saúde humana" e cita "os principios de acción preventiva e de cautela así como a transparencia das medidas relativas preparación e á aplicación de tales liberacións de Organismos Modificados Xeneticamente".

Ao fío do xa bautizado caso "Azelvandre" a Plataforma Galega Anti-Transxénicos aproveita agora para insistir en que se revele en Galiza a localización exacta das leiras onde hai sementeira de transxénicos. "É un dereito da cidadanía en xeral e, nomeadamente, das labregas e labregos, que dependen desta información para poder protexer os seus cultivos dunha segura contaminación", sosteñen.

A plataforma cidadá critica a "actitude incompetente e irrespectuosa" das administracións, que continúan a impedir o coñecemento público deses lugares. Recordan que no ámbito da Xunta, a Consellaría de Medio Rural advertiulles de que se trata de información manexada polo Ministerio de Medio Ambiente, Medio Rural e Mariño. Do mesmo xeito, o goberno español responde agora que a responsabilidade sobre a ampliación de datos debe ser autorizada pola Xunta. O colectivo cualifica de "ridícula" a situación e pregúntanlle ás administracións "que intereses económicos empresariais" apoian fronte ao interese da cidadanía nunha cuestión de "saúde pública".