Vieiros

A praia da Frouxeira-Lago conta con numerosas figuras de protección: Zona de Especial Protección de Aves (ZEPA) e LIC Costa Ártabra, da Rede Natura, Humidal Protexido, Humidal Ramsar e IBA (Important Bird Area) e conta varios taxóns ameazados: a píllara das dunas (Charadrius alexandrinus), vulnerábel; o coleóptero Eurynebria complanata, en grave regresión; ou a herba becerra (Anthirrinum majus linkianum) en perigo de extinción, entre outros. O "campionato" coincide tamén co inicio da reprodución da píllara. ADEGA pide á administración severos controis, mesmo a suspensión, se non pode supervisar in situ o evento para garantir a integridade do contorno.

En ocasións anteriores, competicións similares foron suspendidas polo forte impacto que causan nos ecosistemas dunares e por coincidir coa época de reprodución da píllara das dunas. Dende hai uns anos, os practicantes destes deportes aproveitan a baixamar, tanto de día como de noite, para percorrer sobre todo a zona SW da praia, xusto a máis querenciosa como zona de descanso e alimentación das charadriformes invernantes. Ademáis, algúns destes trebellos tamén poden desprazarse pola area seca no supralitoral, coa perturbación que iso supón para as píllaras das dunas, que agora comezan o seu ciclo reprodutivo.

Malia ás "medidas de protección" habilitadas este ano pola organización, ADEGA solicita á Dirección Xeral de Conservación da Natureza que supervise in situ o evento, dispoñendo o persoal especializado e as medidas de control pertinentes para salvagardar os valores naturais do contorno. En caso contrario, solicitamos a suspensión deste "campionato": non pode deixarse a xestión das especies protexidas e en perigo de extinción a colectivos privados como clubes deportivos, ou asociacións de cazadores (como no caso da arcea e a agacha)