Vieiros

Vieiros de meu Perfil


Eleccións Galiza 2009

RSS de Eleccións Galiza 2009
GALIZA2009

Un país cara á sociedade da información

Os tres principais partidos confían en recortar a fenda dixital que nos sitúa nas últimas posicións do noso contorno xeográfico.

Modesto del Río - 10:30 15/02/2009

Nos últimos catro anos moito cambiou no eido da sociedade da información, tanto en Galiza como en todo o mundo. Quizais o máis importante foi que, por fin, o Goberno aprobou o Plano Estratéxico Galego da Sociedade da Información (PEGSI), que ten como principal obxectivo reducir a fenda dixital, un dos males endémicos do país.

O plan partiu dunha análise, dividida en oito sectores, do estado das novas tecnoloxías en Galiza, e que se presentou en novembro de 2007. O programa define as estratexias operativas que deberá seguir a Xunta até 2010 para converter as tecnoloxías da información e da comunicación en motor económico do país.

Un dos instrumentos instituídos polo PEGSI é o Observatorio da Sociedade da Información, que analiza o uso das novas tecnoloxías e elabora informes anuais sobre o desenvolvemento da sociedade da información en Galiza.

Se no ano 2005 o 78 por cento dos fogares galegos carecía de conexión á internet, dous anos despois (último informe oficial dispoñíbel) a porcentaxe reducírase ao 66%. Do mesmo xeito, pasouse do 38% de vivendas con computador en 2004 ao 56,3 de 2007, máis preto da media estatal, situada no 60,7 por cento. Tamén foi medrando a penetración da banda larga, do 8,7 por cento de 2004 ao 23,1 de 2007. O ADSL e o cable, representado neste último caso polo operador R, foron medrando a súa implantación fronte ás conexións mediante módem, que pasaron de ser as máis habituais en 2005, co 43,6% das conexións, a minoritarias en 2007 (15,3% fronte a 41,9 de ADSL e 32 de cable).

A fenda dixital no interior de Galiza segue a existir entre o rural e o urbano e entre a metade occidental e a metade oriental. A banda larga non chegou aínda á totalidade da cidadanía, aínda que se levaron a cabo diversas iniciativas para estender estes servizos, como varios programas de instalación de redes sen fíos Wimax, tanto en concellos rurais como en polígonos industriais que non dispoñían de conexións á internet de calidade. O último acordo foi un convenio co Estado Español, de 100 millóns de euros, para estender a banda larga e a televisión dixital terrestre ao país.

As empresas tamén se foron sumando, durante a lexislatura, á sociedade da información. Ao remate de 2007 dispoñían de acceso á rede o 74,3 por cento das pemes e o 93,2 por cento das de máis de 10 persoas empregadas. A dispoñibilidade de páxina web apenas medrou: do 28% de 2005 ao 29,4 de 2007. O uso do comercio electrónico tamén medrou, até o 25,5%, que aumenta ao 32,1% no caso das empresas de máis de 10 traballadores. Porén, a súa utilización foi principalmente para compras: só o 9,6% venden a través da rede.

Para potenciar o uso do comercio electrónico, un xeito de aumentar mercado e horarios, o Goberno tamén puxo en marcha iniciativas como Mercadogalego.eu, un portal que lles facilita ás pequenas e medianas empresas contar cun escaparate de balde.

Porén, Galiza segue a estar á cola do Estado Español nos indicadores de sociedade da información. E algúns indicadores amosaron un empeoramento, como é o caso do Informe e2008 da Fundación Orange, que amosa que o noso país baixou no Índice de Converxencia da Sociedade da Información, pasando do 78 do ano 2007 ao 72 de 2008. Só ten por detrás a Canarias (71) e a Extremadura (69). Dende 2007 pasáronlle por diante Castela e León, a Comunidade Valenciana, Cantabria e Murcia. Os datos son moito mellores no referente a empresas (índice 86, no oitavo posto do Estado Español) que con respecto aos fogares (índice 73, penúltimo posto).

Por iso, aínda queda moito camiño por andar para acurtar distancias co Estado Español e con Europa. Os próximos desafíos están reflectidos nos obxectivos da estratexia i2010 da Unión Europea, que aspira a acadar nese ano un acceso total á administración por vía electrónica e acadar o 100% de cobertura de accesos á internet de alta velocidade. Outro obxectivo a curto prazo relacionado coas novas tecnoloxías é o despregamento da televisión dixital en todo o territorio do país, caracterizado pola dispersión da poboación e os accidentes xeográficos, antes do apagón analóxico, a máis tardar en abril de 2010.
 

SE CAMBIA O GOBERNO


O PPdeG pretende superar a fenda dixital aproveitando as oportunidades das novas tecnoloxías, incidindo na alfabetización dixital e tirar partido das TIC para aumentar o peso do sector terciario na economía e fronte a crise. Promete impulsar o Clúster das empresas de novas tecnoloxías e promocionar a instalación de empresas do sector TIC no país, facilitar a incorporación das pequenas e medianas empresas á sociedade da información e potenciar e coordinar as iniciativas que prestan diversos organismos públicos, como o CIS ou o CESGA. Anuncia, tamén, o desenvolvemento da rede de telecomunicacións coas tecnoloxías máis axeitadas para cada contorno e, no eido institucional, centralizar nunha única unidade administrativa todas as actuacións en materia da sociedade da información. Pretende, ademais, elaborar un Plan Estratéxico Tecnolóxico para definir as prioridades de cada eido da administración.

No referente ás infraestruturas, o PPdeG quere garantir a capacidade de acceso de toda a poboación ás novas tecnoloxías, para o que elaborará un plan integral de implantación de infraestruturas básicas e prestar axudas aos concellos para a implantación de redes sen fíos e subvencións para a adquisición de equipos informáticos e a contratación de accesos á internet. Tamén se fixa como obxectivo fornecer acceso de balde ou con prezos reducidos ás persoas con dificultades, e elaborar un Plan Integral de Alfabetización Dixital Básica, no que terá un papel importante unha nova rede de telecentros. Ademais, impulsará a e-Administración, co uso de software libre e estándares abertos, a formación do funcionariado e a xeneralización do acceso telemático, tendo o obxectivo de que toda a cidadanía poida coñecer por diversos medios o estado dos seus trámites. O PPdeG tamén incidirá no uso da sinatura, factura e DNI electrónicos e reformar a web da Xunta cunha visión única.

SE CONTINÚA O PACTO DE GOBERNO

No seu programa, o PSdeG promete universalizar a banda larga para a todalidade da poboación, en todos os núcleos e parques industriais, garantir que a cobertura da TDT supere a analóxica, consolidar a administración electrónica orientando todos os servizos públicos ao uso das tecnoloxías da información. Así mesmo, contempla o despregamento dunha nova rede dixital de telecomunicacións oficiais e de emerxencia, facilitar o acceso das pemes ás TIC para incrementar a súa competitivade e crear o Observatorio da Competitividade dentro da Fundación Galega para a Sociedade do Coñecemento. Pretende, igualmente, potenciar o software libre na administración, sanidade e educación, instalar puntos Wifi en espazos de interese social, especialmente rurais, poñer en marcha o centro Gradiant en Vigo e achegar as novas tecnoloxías ás persoas maiores ou con discapacidade.

O BNG anuncia que seguirá a actuar de forma decidida a prol da sociedade da información, como na anterior lexislatura malia non ter todas as competencias baixo a súa responsabilidade. Entre os seus obxectivos están executar un plano director de construción de infraestruturas de banda larga de cara a 2013, coordinar un plan de medidas de acceso á banda larga cos concellos, reclamar as transferencisa da explotación do espectro radioeléctrico e da vixilancia do cumprimento dos servizos de Telecomunicacións. Reivindicará que Galiza sexa sede da Axencia Estatal de radiotelecomunicacións e pretende crear un constorcio para estabilizar a rede de dinamización e estendela a todos os concellos. Aspira, tamén, a que se fortaleza o uso do galego nas TIC e nas redes sociais e a potenciar o uso do software libre e o papel de Mancomún. Ademais, conta con implantar a administración electrónica, acompañada da formación necesaria, integrar as persoas con discapacidade e desenvolver máis ferramentas sectoriais en software libre. No eido laboral, deseñará un plan de inmersión na sociedade da información de autónomos e micropemes, apoiar o asociacionismo nas empresas TIC e fomentar a creación de contidos dixitais. Amais disto, creará un viveiro de empresas TIC no campus da Coruña e decretará o uso dos estándares abertos na Administración. Outras iniciativas son universalizar a televisión dixital, desenvolver un programa de reciclaxe de residuos electrónicos e aglutinar todos os aspectos relacionados coa sociedade da información nun único órgano.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: