Vieiros

O Goberno aprobou este xoves ampliar en 100 millóns de euros o orzamento do Instituto Galego de Promoción Económica (Igape). Deste xeito, pretende proporcionar unha liña adicional de financiamento a través de préstamos para pequenas e medianas empresas que serán cubertos con recursos captados do mercado polo instituto.

Os préstamos pretenden facilitar a continuidade da actividade e o mantemento do emprego nas empresas. Será unha liña complementaria ás axudas que outorga en colaboración co Banco Europeo de Investimentos, co Instituto de Crédito Oficial e coas entidades financeiras.

Os 100 millóns de euros adicionais débense ao contexto de crise económica mundial e de restrición de crédito actual, que impide que empresas técnica e economicamente viábeis atopen financiamento.

Formación para sectores estratéxicos
Tamén se aprobou a primeira orde de axudas para paliar a crise en cinco sectores estratéxicos do país, froito dun acordo entre as organizacións que asinaron o Diálogo Social. Realizaranse plans extraordinarios de formación neses sectores: téxtil, alimentación, madeira, construción e metal, preferentemente automoción.

O investimento inicial para a convocatoria das actividades formativas será de 25 millóns de euros, e beneficiará arredor de 15 mil persoas traballadoras. A medida pretende que as empresas optimicen os períodos de menor carga de traballo para formar o seu persoal, e así evitar abrir expedientes de regulación de emprego (ERE). De feito, un dos requisitos básicos é que as compañías non presenten ERE para poder acceder ás axudas. Outro é que incorporen módulos relacionados coas tecnoloxías da información, a sensibilidade ambiental ou a saúde laboral.