Vieiros

Este novo golpe xudicial ao Plano Acuícola, aprobado o pasado ano polo Consello da Xunta, únese aos contenciosos interpostos nas vilas de Ribeira (piscifatoría da Laxe Brava), Carnota (piscifatoría de Quilmas) e Muxía (piscifatoría de Merexo), e á recente desestimación da demanda interposta por Acuinor contra ADEGA pola paralización da piscifatoría de Rinlo (Ribadeo).

Os veciños e veciñas de Camelle quixeron tamén amosar o seu compromiso coa defensa do seu patrimonio natural fronte á desfeita do cemento e as lonas negras, subscribindo un documento polo que se comprometen a non vender os terreos nos que está previsto ubicar a macrogranxa. Deste xeito, dos 217.000 m2 que ocuparía a instalación, preto do 81% (175.692 m2), non se venderán á patronal do peixe plano, polo que a Sra. Carme Gallego terá que expropiárllelos áos veciños/as para cederllos aos seus amigos os rodaballistas… se se atreve. Faise efectivo portanto, o berro tantas veces expresado fronte aos despachos administrativos: que CAMELLE NON SE VENDE.

Dende ADEGA, queremos transmitir os nosos parabéns á veciñanza de Camelle polo seu traballo e exemplar compromiso coa terra, e achegarlles unha mensaxe de ánimo e apoio: con intelixencia e firmeza, o Plano Acuícola non pasará!